ភ្នំពេញ៖ ចាប់ពីពេលនេះទៅ មន្រ្តីមានក្បាលពោះធំជ្រុល មិនឱ្យចេញធ្វើការខាងក្រៅទៀតទេ! ជាពិសេសការងារចរាចរណ៍ និងប្រតិបត្តិការនានា។ អង្គភាព ត្រូវរៀបចំកម្លាំងមានក្បាលពោះធំ ឱ្យធ្វើការក្នុងការិយាល័យ។ អ្នកចង់ចេញក្រៅ ឬបើមានតម្រូវការចេញប្រតិបត្តិការការងារខាងក្រៅ ត្រូវតែហាត់ប្រាណឱ្យមើលទៅសមរម្យ។ នេះបើតាមប្រសាសន៍របស់លោកអភិសន្ដិបណ្ឌិត ស សុខា ឧបនាយករដ្ឋមន្រ្តី​ រដ្ឋមន្រ្តីក្រសួងមហាផ្ទៃ បានថ្លែងក្នុងកិច្ចប្រជុំមួយកាលពីថ្ងៃទី១៤ ខែតុលាកន្លងទៅ។ 

បើតាមការបញ្ជាក់របស់លោក រ៉េន រតនៈ អ្នកនាំពាក្យលោកអភិសន្តិបណ្ឌិត ស​ សុខា នៅថ្ងៃទី១៦ ខែតុលានេះបានអះអាងបន្ថែមថា ករណីនេះ (មន្រ្តីដែលមានក្បាលពោះធំ រូបរាងមិនសូវសមស្រប) ទោះមានតិចតួចធៀបនិងកម្លាំងសរុប តែលោកអភិសន្តិបណ្ឌិត ស សុខា បានយកចិត្តទុកដាក់ និងផ្ដល់ការរំលឹកណែនាំជារឿយៗ តាំងពីដើមនីតិកាលថ្មី (រាជរដ្ឋាភិបាលនីតិកាលទី៧នេះ) ។ 

ដោយឡែក ពាក្យថា "ស្តង់ដា" ដែលលោកអភិសន្តិបណ្ឌិត ឧបនាយករដ្ឋមន្រ្តី​ រដ្ឋមន្រ្តីក្រសួងមហាផ្ទៃ បានតម្រូវពេលនេះ គឺយ៉ាងហោចណាស់ឱ្យបាន "សមរម្យ" គឺសមភ្នែកមហាជន សមនិងអាចអនុវត្តការងារបាន ពោលគឺមិនមែនធំលើតូចក្រោម ឬធាត់ក្បាលពោះធំហួស ដែលចៀសមិនផុតពីការមិនអាចបំពេញការងារបានល្អ និងរហ័សរហួននោះឡើយ។ អ្នកនាំពាក្យដដែលបាន​បញ្ជាក់បន្ថែមថា លោកអភិសន្តិបណ្ឌិត មិនបិទផ្លូវដល់មន្រ្តីនោះទេ ពោលគឺផ្ដល់ជម្រើសឱ្យធ្វើការហាត់ប្រាណ និងកាត់បន្ថយរបបអាហារមិនត្រឹមត្រូវជាដើម៕